Danum

Ing Kekatang Danum
O Jo, atin ku sa’ng buring sabyan keka
Buri kung abalu mu ing maulaga
Pag minum kang danum, ing biye kumaba ya
Tutu ing sasabyan ku, maniwala ka.

Ing panawun tamu ngeni, mapali ng madalas
Etana aiwasan ing mipapawas
Banta ing katawan ali ya tumakas,
Minum kang danum banta eka kumupas.

Ing global warming pane ya keng balita
Oneng sobrang pali ing ramdam ning madla
Atin pa pin akwa na ng manimutla
Minum na kang danum, basu labinlima.

Ing danum, dala na ka king kaligtasan
Ali kalupa reng alwang iinuman
Mikasala ka mu king sobrang tagayan
Ing alak ampo softdrinks, enaka sopan.

Ikayu pu ing kakung pigaganakan
Masanting nung mayap tamu kalagayan
Masanting nang miwas bayu me pa ulwan
Minum ta na mung danum, Ikatamu ngan!

Fernando Zablan Jr.
Venessa Joy Barro
Holy Angel University

Ligaya keng Basu

Tune ating ligaya keng basung aaldukan
Maglako yang pagal at kasakitan
Ing biye tamu midudugtungan
Ing danum talaga agyu na yan!

Ing danum pu, dakal ya asaup kekatamu
Yang magpagana keng kekatang pangatawu
Nung ala ing danum syempre mate tamu
Kaya pin painuman naka tamu ning Ginu.

Balu mu ba keng magbayung klima
Msanting nung minum danum, basung labinlima
King pali ning singo ning aldong masala
Nung kulang ka basa, lunto kang maputla

Deng tawung mapanalang basung mikilaman
Malinis la bituka at kalamnan
Mibabawas la pa sakit a isip-isipan
King lugud ning Ginu, ala kang probleman

Nung eka bisang mabaknal, minum ka
Nung bisa kang mipasno, minum ka
Nung buri mu kumabye pa’t lumigaya
Dakal tamung danum, sige minum ka.